يا شاعر تباً للجرح
:
:
احسب احسابك اذا كلت الوداع
الكلمة من تجرح كلب ما تنمسح
وانا أكص ايدي إذا عني تروح
حتى لو رديت ما مدها بصلح
وما اصيرن شجرة لو منشار اجيت
شما تروح وترجع تريد انجرح
باب التسده الرياح من الجنوب
ينطبك لو شملت ما ينفتح
والكاع لو طكها العطش تقبل تموت
بس اذا رد المطر تلبس ملح
ولا تكلي الشوك بذرة من السماح
بذرة المسمومة تكطعها الفلح
ولا تكلي الفركة موت العاشكين
الموت اصح من الحياة الما تصح
والليل لو ودع كمر يمكن يشيب
بس اذا شيب صدك يطلع صبح
وانت جاهل ما خذيت ابحجي ابوك
جان ابوك ينصحك وما تنصح
مره كال الحب اساسه الاختيار
ما يصير العتبه تحلم بالسطح
ومره كال اليبني قصره اعله الرمال
بس تطكه الروجه لازم ينمسح
وكال لاتجرح نسر فوكك يطير
وانت نورس توه طالعلك جنح
وكال لا تلعب اذا بعدك غشيم
والله ما تدري الخساره من الربح
ولا تضم اسرارك بجيب العراة
بلا ستر ويطشروهن تنفضح
ولا تعض اصبع ندم وانت البديت
اليعادي الحربه يسكت عالجرح
وانه شفتك من كمت تلعب وراي
وبيه تطعن والاثر ما ينمسح
وانفتحلك كلبي بس غصبن عليه
السيف لو مر كلب مو ينفتح
وجربت كتلك احبك وابتليت
ما تخيلتك علي تردح ردح
وانا ما حبك جذب اضحك عليك
الحصوة صدكت روحها يحبها الصرح
جنت اجامل حالي حال العاشكين
غني كتلك اعطني الناي الصبح
وانت حسبالك صدك بلبل تصير
واذبحتني بصوتك الينبح نبح
وانا ما عندي ذنب انت البديت
ما ذكرت العشره وسنين الملح
وانا واكف قمتي اتضلل عليك
وانت كاعد منتجي وصدري السفح
كله منك فكرت تطرحني ليش !
شفته شيسوي الجبل من ينطرح
نائــْل المظفـر
__________________
اذا حجيك حكم وتخاطب الناس... كل راس إعله كده وياك ينشد
لأن روس البشر عكس الفراغات... كلما تنترس تستوعب أزيد
وإذا تحجي ويرد صوتك كما كان .....يعني اليستمع فارغ مجرد
صوتك ما يرده الراسه متروس...لأن بس بالفراغ الصوت يرتد
موضوع: يا شاعر تبا للجرح 
الأحد يناير 24, 2010 10:03 pm
